स्याङ्जामा गोठमा काम गरिरहेका किसानमाथि पहिरो खस्यो, एक जनाको मृत्यु
पोखरा, ३२ असार/ वर्षापछि आएको पहिरोमा पुरिँदा स्याङ्जामा एक किसानको मृत्यु भएको छ । पहिरोले गोठ पुरिँदा दुई चौपायामा समेत क्षति पुगेको छ ।
बिहीबार बिहान गल्याङ नगरपालिका–६ बनपालेका ६५ वर्षीय धनबहादुर थापाले गोठमा काम गरिरहेका बेला माथिबाट अचानक पहिरो खस्दा मृत्यु भएको जिल्ला प्रहरी कार्यालय स्याङ्जाले जानकारी दिएको छ ।
ढुंगा–माटोले बनेको खरले छाएको एकतले कच्ची गोठमाथि पहिरो खस्दा थापा गोठसहित पुरिएका थिए । उद्धारका क्रममा धनबहादुर थापा मृत अवस्थामा फेला परेको प्रहरीको भनाई छ । पहिरोले गोठमा बाँधिएको एक भैंसी पनि मरेको छ । त्यस्तै एउटा बंगुर घाइते अवस्थामा फेला परेको प्रहरीले जनाएको छ ।
प्रहरीका अनुसार घटनास्थलमा आवश्यक मुचुल्का तथा थप अनुसन्धानको काम भइरहेको छ ।
