भूकम्प
धनगढी, १६ असोज/ बझाङ केन्द्रविन्दु बनाएर मंगलबार गएको भूकम्पले केही घर भत्किएका छन् भने केही घाइते भएका छन् । भूकम्पका कारण सुदूरपश्चिमका जिल्लाहरूमा धक्का महसुस भएको छ । बझाङमा ६ जना र अछाममा एक जना घाइते भएका छन् ।
बझाङमा सत्यवादी मावि भोपुरका चार विद्यार्थीसहित पाँच जना र केदारस्युँ गाउँपालिकाका एक जना गरी छ जना घाइते भएको प्रहरीले जनाएको छ । घाइतेहरूलाई बझाङ जिल्ला अस्पतालमा लगिएको छ ।
अछाममा विद्यालयको भवनबाट हामफाल्दा एक विद्यार्थी घाइते भएका हुन् । विद्यार्थीको स्थानीय गोडा स्वास्थ्य चौकीमा उपचार भइरहेको छ । अछाममा पनि विद्यालयका भवनहरू चर्किएका छन् ।
क्षति विवरण संकलन भइरहेको प्रहरीले जानकारी दिएको छ । सदरमुकामका पक्की घरहरू चर्किएका छन् । गाउँका कच्ची घर तथा विद्यालयहरू भत्किएका छन् ।
राष्ट्रिय भूकम्प मापन केन्द्र सुर्खेतका अनुसार बझाङको जयपृथ्वी नगरपालिका केन्द्रबिन्दू बनाएर दिउँसो २ बजेर ४० मिनेटमा ५ दशमलव ३ रेक्टरको भूकम्प गएको थियो ।
त्यसको २६ मिनेटपछि सोही क्षेत्र केन्द्रबिन्दू बनाएर ६ दशमलव ३ रेक्टरको भूकम्प गएको जनाएको छ ।
