पोखरामा भएको क्रिकेटमा एकै खेलमा ९ विकेटको कीर्तिमान
पोखरा, २३ पुस/ पोखरामा भई रहेको प्रधानमन्त्री कप गण्डकी प्रदेशस्तरीय एकदिवसीय क्रिकेट छनौट प्रतियोगिताको एकै खेलमा ९ विकेटको कीर्तिमानी भएको छ ।
पोखरा रंगशाला क्रिकेट मैदानमा आइतबार नवलपुरलाई पराजित गर्ने क्रममा चामत्कारिक प्रदर्शन गर्दै तनहुँका सन्दीप पराजुलीले ९ विकेट लिएका हुन् ।
राष्ट्रिय स्तरको क्रिकेटको प्रतियोगितामा यो दोस्रो उत्कृष्ट बलिङ प्रर्दशन हो । वीरगन्जबाट खेल्दै तीब्र बलर अविनाश कर्णले २०६५ को यू–१९ पुरुष राष्ट्रिय क्रिकेट प्रतियोगितामा बैतडीविरुद्ध १० विकेट लिएका थिए ।
काठमाडौंको ग्रेट हिमालय क्रिकेट एकेडेमीमा प्रशिक्षण लिदैं आएका उनी धादिङका हुन् । तर नेपाल क्रिकेट संघबाट धादिङले मान्यता पाइनसकेकाले उनी तनहुँबाट खेलेका हुन् ।
