पोखराको पुम्दिकोटमा ड्रिम सिटी पार्क, एकोरियम देखी सिसाको पुल
पोखरा, ३० असार/ पोखरा २२ पुम्दीकोटमा पर्यटकलाई आक्रषर्ण थप गर्न मनोरञ्जन पार्क ‘ड्रिम सिटी’ सञ्चालनमा आएको छ । पुम्दिकोटमा रहेको महादेवको मूर्ति नजिकै पार्क रहेको छ । पुम्दिकोट महादेवको मन्दिर र पार्क एउटै समयमा अवलोकन गर्न सकिन्छ ।
२५ रोपनी क्षेत्रफलमा फैलिएको पार्कमा हट एयर बलुनको फोटो बुथ, ‘विसिङ ह्याण्ड’, अम्ब्रेला पार्क, सिसाको स्काई वाक, झरना, रेष्टुरेन्ट लगायत सञ्चालनमा आइसकेको छ । पर्यटकहरूले फोटो भिडियो बनाउन सक्ने छन् । त्यसै गरी एक्वीरियम सञ्चालनको तयारीमा रहेको छ ।
ड्रिम सिटी प्रालिले करिब १४ करोड रुपैयाँ लगानीमा ड्रिम सिटी सञ्चालनमा आएको हो । पार्कमा युवा उद्यमीहरु विनोद पौडेल, श्यामकुमार बजगाई, दिवश गुरुङ र स्थानीयहरुको लगानी रहेको छ ।
पार्क भित्रै रहेको रेष्टुरेन्टमा एकैपटक २ सय जनाले सेवा लिन सक्ने सञ्चालक श्याम बजगाईंले बताए । पार्कबाट अन्नपूर्ण, माछापुच्छ्रे हिमाल, धौलागिरी, फेवाताल, स्तुपा लगायतको दृश्यावलोकन गर्न सकिने बजगाईले बताए । पार्कलाई एउटा क्रुज शीप आकारमा निर्माण गरिएको छ ।
ड्रिम सिटीले नेपालकै ठूलो एक्वारियम अन्तिचरणमा रहेको उनले बताए । ४८ फीट लामो एक्वारियममा मानिसहरु प्रबेश गर्दा समुन्द्रमा प्रबेश गरेको अनुभव गर्ने छन् । पार्क भित्र प्रवेश गर्न २५० रुपैयाँ शुल्क तिर्नुपर्नेछ । त्यसपछि भित्र रहेका अम्ब्रेला पार्क, विसिङ ह्याण्ड लगायतको अवलोकन गर्न सकिने छ ।
त्यसै गरी ४ सय ५० रुपैयाँमा पार्कको पूरै अवलोकन गर्न पाइन्छ भने रेस्टुरेन्टमा खाजा समेत दिने उनले बताए । अहिले ४० जनाले रोजगारी पाएको उनले बताए ।
