देवीजङ्ग गुरुङ
पोखरा, ३ जेठ/ मादी गाउँपालिकाको अध्यक्षमा नेपाली कांग्रेसका देवीजंग गुरूङ र उपाध्यक्षमा नेकपा एमालेकी कल्पना गुरुङ विजयी भएका छन् ।
कांग्रेसका गुरुङले नेकपा एमालेका शिवबहादुर गुरूङलाई ८ सय ३४ मतान्तरले पराजित गरे । देवीजंगले ६ हजार ५ सय ८४ मत ल्याउँदा शिवले ५ हजार ७ सय ५० मत प्राप्त गरे ।
उपाध्यक्षमा भने एमालेकी कल्पना गुरूङ निर्वाचित भएकी छन् । उनले गठबन्धनका तर्फबाट माओवादी केन्द्रका लालबहादुर गरूङलाई पराजित गरिन् । कल्पनाले ५ हजार ८ सय २८ र लालबहादुरले ५ हजार ६ सय १६ मत प्राप्त गरे ।
मादीमा कांग्रेसले ७, एमालेले ३ र माओवादीले २ वटा वडा अध्यक्ष जितेको छ । मादीमा १८ हजार ७ सय ८२ मतदाता रहेकोमा १३ हजार ७ सय मत खसेको थियो । २०७४ को निर्वाचनमा अध्यक्ष र उपाध्यक्ष दुवै एमालेले जितेको थियो ।
