पोखरा एक केन्द्रमा शत प्रतिशत मत खस्यो, कास्कीमा २० प्रतिशत, शान्तिपूर्ण रूपमा निर्वाचन जारी
पोखरा, २१ फागुन/ कास्की कारागारमा शत प्रतिशत मतदान भएको छ भने कास्की जिल्ला भर २० प्रतिशत मत खसेको छ । अस्थायी मतदान केन्द्र रहेको ३७ जना कैदीबन्दीले मताधिकार प्रयोग गरेका छन् ।
मतदान अधिकृत गोविन्द श्रेष्ठका अनुसार बिहान ७ बजेदेखि सुरु भएको मतदान प्रक्रिया करिब साढे दुई घण्टामै सम्पन्न भएको थियो ।
कारागारभित्र ३८ जनाको नाम मतदाता नामावलीमा समावेश भए पनि एक जना धरौटीमा छुटेकाले ३७ जनाले मात्रै मतदान गरेका हुन् ।
कास्की जिल्लाभर विहान ११ बजे सम्म २० प्रतिशत अर्थात करिब ६१ हजार मत खसेको निर्वाचन कार्यालय गण्डकीका प्रमुख नारायण ढकालले जानकारी दिए । अहिले जिल्लामा निर्वाचन प्रक्रिया सौहार्दपूर्ण र व्यवस्थित रूपमा अघि बढिरहेको उनले बताए । निर्वाचन वातावरण शान्त, मर्यादित र उत्साहपूर्ण रुपमा मतदान गरिरहेको बताए ।
कास्की जिल्लाभर दुई अस्थायी मतदान केन्द्रसहित ३ सय ६५ मतदान केन्द्र र १ सय ५३ मतदान स्थल रहेका छन् । बिहान ७ बजेदेखि बेलुका ५ बजेसम्म मतदान समय निर्धारण गरिएको छ । मतदान सम्पन्न भएलगत्तै आजैदेखि मतगणना कार्य सुरु गरिने तयारी गरिएको छ ।
ं
