पोखरामा पहिरोले एक जनाको मृत्यु, दिपाङ्ग तालमा फसेकाको उद्धार
पोखरा, २६ असार/ पोखरा महानगरपालिका वडा नम्बर २७ सहेलापाटामा पहिरो जाँदा एक जनाको मृत्यु भएको छ । घरमाथीबाट आएको पहिरोले पुरिदा २२ बर्षीय भिमबहादुर थापाको मृत्यु भएको हो ।
मन बहादुर थापाको ब्लकले बनेको जस्ताले छाएको १ तले कच्ची घरमा घर माथीबाट आएको पहिरोले पुरेको थियो । भिमबहादुरकी आमा ५० बर्षीय कमला थापाको सकुसल उद्धार भएको छ ।
घर माथीबाट विहान ४ बजेतिर पहिरो आएको थियो । स्थानीय ईलाका प्रहरी कार्यालय शिसुवा र सशस्त्र प्रहरी बल नेपाल २४ नम्बर गण कालिका गण मालेपाटनको टोली उद्धारका लागि पुगेको थियो ।
त्यसै गरी वर्षाका कारण पोखरा महानगरपालिका २७ दिपाङ्ग तालमा फसेका चार जनाको सशस्त्र प्रहरीले सकुशल उद्धार गरको छ । वर्षाका कारण पानीको सतह बढेपछि डुबानमा फसेका एकै परिवारका ४ जनालाई सशस्त्र प्रहरी बल नं २४ कालिका गण पोखराको टोलीले उद्धार गरेको हो ।
गुल्मी स्थायी घर भई हाल सत्यराज ढकालको घरमा भाडामा बस्दै आएका राम बहादुर अधिकारी, सृजना अधिकारी र उनीहरुका छोरा छोरी आयुष अधिकारी र आयुष्का अधिकारीलाई उद्धार गरेका कालिका गणका गणपति एसपी अरुण कुमार शर्माले जानकारी दिए ।
