पोखरामा नाबालिकालाई बन्धक बनाएर जबरजस्ती करणी आरोपमा दुई जना पक्राउ
पोखरा, २३ असार/ पोखरामा १३ वर्षकी १ नाबालिकालाई जबरजस्ती करणी भएको आरोपमा २ जनालाई प्रहरीले पक्राउ गरेको छ ।
पोखरा महानगरपालिका वडा नम्बर ११ रानीपौवामा घटना भएको हो । नाबालिकालाई तनहुँबाट अपहरण गरी जबर्जस्ती करणी गरेको अभियोग छ ।
पक्राउ पर्नेमा धनुषा क्षिरेश्वर गाउँपालिका घर भई हाल पोखरा–११ बस्ने २१ वर्षीय अरुणकुमार दास र भारतको बिहार प्रदेश सीतामणि स्थायी घर भई पोखरा–११ बस्ने १९ वर्षीय सुनील दास छन् ।
असार १७ गते सोमबार बिहान ११ बजे २ युवाले नाबालिकालाई तनहुँको म्याग्दे गाउँपालिका वडा नम्बर ४ थर्पुबाट ललाईफकाई, छलकपट गरी झुक्यानमा पारी, डरत्रास देखाई ग८प ४२८० नम्बरको मोटरसाइकलको बिचमा राखी पोखरा ल्याएको कास्की प्रहरीका सूचना अधिकारी डीएसपी वसन्तकुमार शर्माले जानकारी दिए ।
उनीहरुले त्यस दिन रानीपौवास्थित कोठामा बन्धक बनाएर राखेको र सोही दिन राति १ः३० बजे ती नाबालिकामाथि पालैपालो जबरजस्ती करणी गरे अनुसन्धानबाट खुलेको शर्माले बताए ।
बालिकालाई तनहुँतर्फ लैजाने क्रममा पोखरा–३०, पावरहाउस स्थित पृथ्वीराजमार्गबाट उनीहरु पक्राउ गरेको उनले बताए ।
पक्राउ परेका दुवैबिरुद्ध कास्की जिल्ला अदालतबाट अपहरण, शरीर बन्धक तथा जबर्जस्ती करणीसम्बन्धी मुद्दामा ८ दिन म्याद लिएर अनुसन्धान भइरहेको डीएसपी शर्माले जानकारी दिए । बालिकालाई उनकै बाबुको जिम्मा लगाइएको शर्माले बताए ।
