चितवन माइक्रोबस दुर्घटनाः ट्रेकिङ गरेर फर्किएका शिक्षक दम्पतीको ज्यान गयो
पोखरा, २६ कात्तिक/ चितवन माइक्रोबस दुर्घटनामा परेर नवलपुरका शिक्षक दम्पतीको निधन भएको छ । नवलपुरको विनयी त्रिवेणी गाउँपालिका–४ बगैँचाका ३५ वर्षिय सन्तोष भुषाल र उनकी श्रीमती ३३ वर्षिय सविना भुषालको नारायणगढ–मुग्लिन सडकखण्डको सत्रकिलोमा शुक्रबार बिहान भएको दुर्घटनामा परेर ज्यान गुमाएका हुन् ।
विराटनगरबाट काठमाडौं जाँदै गरेको बा प्र ०३–००१ ख २८१२ नम्बरको बस र पोखराबाट नारायणगढतर्फ जादै गरेको बा प्र ०६–००१ ज ०२९८ नम्बरको उनीहरू सवार इलेक्ट्रिक माइक्रो भ्यान ठक्कर खाँदा भुषाल दम्पती सहित अन्य ३ जनाले ज्यान गुमाए । दुर्घटनामा गम्भीर घाइते भएका उनीहरूको उपचारको क्रममा ज्यान गएको हो ।
भुषाल दम्पति तिहार मनाएर मर्दी हिमालमा ट्रेकिङ गएका थिए । उनिहरू ट्रेकिङ सकाएर माइक्रोमा घर फर्कदै गर्दा दुर्घटनामा परेका हुन ।
मृतक दुवैजना शिक्षक हुन् र उनिहरू सोही वडामा रहेको मणिसिद्ध आधारभूत विद्यालय, धर्साहमा कार्यरत थिए । सन्तोष राहत कोटाको शिक्षकको रुपमा कार्यरत थिए भने सबिना करार शिक्षक थिइन् । उनिहरुका ९ वर्षका एक छोरी र ५ वर्षका एक छोरा छन् ।
मृत्यु हुनेमा भुषाल दम्पतीसहित गोरखाको आरुघाट गाउँपालिका १ मान्बुका ४२ वर्षिय राज बहादुर गुरुङ, माईक्रोबस चालक चितवनको खैरहनी नगरपालिका वडा नम्बर ४ का ४० वर्षिय अनोज अधिकारी र भारत घर भई पोखरामा किसाना पसल गर्दै आएका ३६ वर्षिय राजकुमार शाह रहेका छन् ।
