३२ वर्ष शिक्षणपछि भावुक बिदाइः विद्यालयको चौरमा ढोग गर्दै अवकाश, विद्यार्थीले बाजागाजासहित घरसम्म पुर्याए
पोखरा, १२ असार/ पोखरा महानगरपालिका–२३ माझथुमस्थित सिद्ध वराह माध्यमिक विद्यालयमा ३२ वर्षसम्म अध्यापन गरेका शिक्षक तुलसी प्रसाद भण्डारीले अनिवार्य अवकाश ग्रहण गर्दै विद्यालयसँग भावुक बिदाइ लिए ।
तीन दशकभन्दा लामो समय शिक्षा सेवामा समर्पित भण्डारीले विद्यालयबाट विदा हुने क्रममा विद्यालयको चौरमा ढोग गर्दै आफ्नो सम्मान र भावनात्मक सम्बन्ध व्यक्त गरे । त्यसपछि विद्यार्थीहरूले बाजागाजासहित भण्डारीलाई सम्मानपूर्वक घरसम्म पुर्याएका थिए। बिदाइ समारोहमा शिक्षक, विद्यार्थी, अभिभावक तथा स्थानीयवासीसमेत भावुक बनेका थिए।
अवकाशका अवसरमा भण्डारीले विद्यालयका घण्टी, कक्षाकोठाका अविस्मरणीय क्षण, विद्यार्थीहरूको माया र सम्मान अब आफ्ना जीवनका अमूल्य सम्झना बनेर रहने बताए । विद्यालयका अन्य शिक्षकले ३२ वर्षको शिक्षण यात्रामा केवल पाठ्यपुस्तकका विषयवस्तु मात्र नसिकाएको भन्दै हजारौँ विद्यार्थीको जीवन, सोच र भविष्य निर्माणमा महत्वपूर्ण योगदान पुगेको बताए ।
