पोखरामा नक्कली पेस्तोल सहित दुईजना पक्राउ, लागुऔषध र नौ लाख सहित एकजना पक्राउ
पोखरा, ११ वैशाख/ पोखरा ८ सिमलचौर क्षेत्र आसपासका बिभिन्न स्थानमा हतियार देखाएर अरुलाई डरत्रास देखाएको भन्दै कास्की प्रहरीले दुई जना युवालाई पक्राउ गरेको छ ।
पक्राउ पर्नेमा तनहुँ जिल्लाको व्यस नगरपालिका घर भई पोखरा –८ सिमलचौर बस्ने ३२ बर्षीय सुभाष कायस्थ र सोहि ठाउँ बस्ने ३१ बर्षीय सुरज कायस्थ रहेको प्रहरीले जानकारी दिएको छ ।
उनीहरुको सिमलचौर स्थित कोठा खानतलासी गर्दा फलामको रडको स्लाईड स्टिक १ थान, नक्कली पेस्तोल १ थान, पेस्तोल कभर १ थान र नोक २ थान फेलापरेको प्रहरीले जानकारी दिएको छ उनीहरु दुबैजनालाई बिहीबार साँझ प्रहरीले पक्राउ गरेको थियो ।
यसैगरी प्रहरीले पोखरा महानगरपालिका –११ फुलवारीमा खैरो हेरोईन (ब्राउन सुगर) जस्तो देखिने पदार्थ १०२.३७ ग्रामका साथै डिजिटल तराजु १ थान, मोबाइल १ थान र नगद ९ लाख रुपैया सहित एक जनालाई पक्राउ गरेको छ । पक्राउ पर्नेमा पोखरा –११ भानुमार्गमा डेरा गरि बस्ने २७ बर्षीय मन्दिरा मगर रहेको प्रहरीले जनाएको छ ।
लागु औषधको बिक्री बितरण भईरहेको भन्ने सूचनाको आधारमा जिल्ला प्रहरी कार्यालय कास्की र लागू औषध नियन्त्रण व्यूरो शाखा कार्यालय पोखराबाट खटिएको प्रहरी टोलीले उनलाई पक्राउ गरेको कास्की प्रहरीका सुचना अधिकारी प्रहरी निरिक्षक गणेश पाण्डेले जानकारी दिए ।
