धनुष बचत तथा ऋण सहकारी बचत कर्तालाई जोहेरी दिन आह्वान
पोखरा, १३ चैत/ जिल्ला प्रहरी कार्यालय कास्कीले धनुष बचत तथा ऋण सहकारी संस्था लिमिटेडका पीडित बचतकर्तालाई प्रमाणसहित जाहेरी दर्ता गर्न आह्वान गरेको छ । सहकारीका सञ्चालक र पदाधिकारीले निक्षेपकर्ताको रकम फिर्ता नगरी हिनामिना र ठगी गरेको उजुरी परेपछि प्रहरीले चैत २५ गतेभित्र कार्यालयमा सम्पर्क राख्न सूचना जारी गरेको हो ।
कास्कीको पोखरा महानगरपालिका वडा नम्बर ९, सामसुङ गल्लीमा सञ्चालित यो सहकारीका व्यवस्थापक र विभिन्न समयमा रहेका सञ्चालक समिति सदस्यले निक्षेपकर्ताको रकम फिर्ता नगरेको प्रहरीले जनाएको छ । सहकारी रजिस्ट्रारको कार्यालय गण्डकी प्रदेशबाट चैत ८ गते प्राप्त कागजात र पत्रका आधारमा प्रहरीले सहकारी ऐन २०७४ बमोजिम अनुसन्धानअघि बढाएको छ । मुद्दा दर्ता भएसँगै प्रहरीले केही व्यक्तिलाई नियन्त्रणमा लिएर अनुसन्धान गरिरहेको छ ।
अनुसन्धानको प्रक्रियालाई तीव्रता दिँदै प्रहरीले पीडित बचतकर्तालाई आफ्नो रकम दाबी गर्न प्रमाणसहित आउन भनेको छ ।
प्रहरीले बचतकर्तालाई मात्र नभई सहकारीबाट ऋण लिएर नतिर्ने ऋणीहरूलाई समेत चेतावनी दिएको छ । सहकारीबाट ऋण लिई हालसम्म चुक्ता नगर्ने ऋणीलाई तत्काल जिल्ला प्रहरी कार्यालयको अपराध अनुसन्धान शाखामा सम्पर्क राख्न भनिएको छ ।
धनुष बचत तथा ऋण सहकारीको १२ करोड ५६ लाख रुपैयाँ हिनामिना गरेको आरोपमा प्रहरीले ३ जनालाई पक्राउ गरेको छ । सहकारी रजिस्ट्रारको कार्यालय गण्डकीले दिएको प्रतिवेदनका आधारमा जिल्ला प्रहरी कास्कीले सहकारीका सचिब विराज सुबेदी, व्यवस्थापक जगत पौडेल र ऋण उपसमितिका सदस्य कृष्णबहादुर जैसी पक्राउ गरेको हो ।
