सरकारी सम्पत्ति जलाउन लगाएर त्यही मौका छोप्दै जेलबाट भागे काग्रेस सभापति गगन थापा
पोखरा, १५ फागुन/ नेपाली कांग्रेसका सभापति गगन थापाले अबको निर्वाचनपछि मुलुकमा दुई खालको अतिवादको चिन्ता रहेको बताएका छन् ।
नेपाली कांग्रेसले शुक्रबार कास्कीको पोखरामा आयोजना गरेको चुनावी सभालाई सम्बोधन गर्दै सभापति थापाले ‘निर्वाचनपछिको अवस्थाले दुइटा किसिमको अतिवादलाई पोषित गर्ने खतरा छ,’ एमाले र केपी शर्मा ओलीलाई लक्ष्य गर्दै उनले भने, ‘एउटा अतिवाद भदौ २३ र २४ घटनाको अवमूल्यन गर्छ । त्यो भएको हुँदै होइन भन्छ। त्यहाँ युवाहरूको सहभागिता देख्दैन । त्यहाँ असन्तुष्टि व्यक्त भएको देख्दैन ।’
यस्तै अर्को अतिवाद रास्वपा सभापति रवि लामिछानेतर्फ लक्षित गरे । ‘यस्तै प्रकारको अर्को अतिवाद छ । जो मौका छोपेर सिंहदरबार पनि जलाउन लगाउँछ, मौका पर्दै गर्दा आफै जेलबाट पनि भाग्छ ।’ आगामी पाँच वर्षको समय सम्हाल्नुपर्ने उनले बताए । थापाले कसैलाई मौका दिने नाममा देशलाई प्रयोगशाला नबनाउन आह्वानसमेत गरे । सभापति थापाले भदौ २४ गते सिंहदरबार लगायतका सम्पत्ति जलाउन लगाएर त्यही मौका छोप्दै जेलबाट भागेको बताए । यद्यपि उनले लामिछानेको नाम भने लिएनन् ।
उनले एक पक्ष भदौ २३ अघि केही पनि भएको छैन भन्ने र अर्को पक्ष भदौ २४ गते सिंहदरबार लगायतका सरकारी सम्पत्ति जलाएपछि परिवर्तन हुन्छ भन्ने अतिवादी रहेको र त्यो पक्षमा कांग्रेस नरहेको सभापति थापाले बताए ।
थापाले अब मुलुकले यो भन्दा बढी अतिवाद थेग्न नसक्ने बताउँदै अतिवादीलाई निर्वाचनबाट ठुलो शक्ति हुन नदिन आग्रह गरे । कांग्रेस बदलिएर र सङ्कल्प गरेर आएकाले जे भन्छ त्यो पूरा गर्ने बताए । कांग्रेसले ०४६ सालपछि प्रधानमन्त्री भएका शेरबहादुर देउवा र मन्त्री भएका गगन थापाको पनि सम्पत्ति छानबिन गर्ने थापाले बताए । गल्ती गरेको भए परिवारकै मान्छे भए पनि नछोड्ने उनको भनाइ थियो ।
नेपाली कांग्रेसका उपसभापति विश्वप्रकाश शर्माले प्रतिनिधिसभा निर्वाचनपछि बन्ने सरकारमा प्रधानमन्त्री घोषणा गरिएकाहरू बिच फागुन १८ गते खुलामञ्चमा बहसको प्रस्ताव गरे ।
होलीका दिन सँगै होली खेल्न र निर्वाचनपछि बन्ने संसद्को ५ वर्षे कार्यकालमा गर्नुपर्ने कामका एजेन्डामा बहस गर्ने प्रस्ताव गरेको गरे ।
कार्यक्रममा नेपाली काग्रेसबाट कास्कीका उमेद्वार बनेका तिलक रानाभाट, मधु बास्तोला, मनोज गुरुङ र पाटीका नेताहरुले सम्बोधन गरेका थिए । पोखराका अमरसिह चौरमा आमसभाको आयोजना गरेका थिए ।
‘
