स्टेप बाई स्टेपका सञ्चालक बराल दम्पतीलाई पुत्रशोक, योगेशको अमेरिकामा दुर्घटनामा परि निधन
पोखरा, ३० पुस/ पोखराको स्टेप बाई स्टेप माविका सञ्चालक बराल परिवारमा पुत्रशोक परेको छ । विद्यालयका संस्थापक निर्देशक रमाकान्त बराल र प्राचार्य निर्मला बरालका कान्छा छोरा योगेश बरालको अमेरिकामा २ जनवरीमा निधन भएको हो ।
उनी कार दुर्घटनामा परेको हुन सक्ने अमेरिकी प्रहरीलाई उद्घृत गर्दै पारिवारिक स्रोतले जनाएको छ । लामो समयदेखि अमेरिका बस्दै आएका योगेशको जन्म ७ साउन, २०४८ सालमा भएको हो । उनी स्टेप बाई स्टेप नै पढेका हुन् । ३४ वर्षको अल्पायुमै उनको निधनले सिंगो बराल परिवारमा यतिखेर बज्रचोट परेको छ ।
रमाकान्त र निर्मला दम्पतीका २ छोरा र १ छोरीमध्ये जेठा छोरा मार्सल बराल इन्जिनियर हुन् । उनी क्यानाडा बस्छन् । छोरी रोश्ना पनि अध्ययनका सिलसिलामा अमेरिकामै रहँदैआएकी छन् ।
छोरा योगेशको निधन भएको खबर रमाकान्त दम्पतीले क्यानाडामा थाहा पाएका थिए । उनीहरु अमेरिका तथा क्यानाडा भ्रमणका लागि गत २५ मंसिरमा नेपालबाट गएका थिए ।
पहिले अमेरिका हुँदै जेठा छोरा भेट्न क्यानाडा गएका उनीहरुले अप्रिय खबर सुनेपछि फेरि अमेरिका फर्किएर छोराको अस्तू लिई निधनको ११ औं दिन सोमबार नेपाल फर्किएका थिए ।
सोही दिन पोखराको सेती किनार रामघाटमा हिन्दू संस्कारअनुसार स्व. योगेशको अस्तू सेलाइएको थियो । बराल परिवारले १३ दिने किरियाकर्म सुरु गरेको छ । विभिन्न संघसंस्थामा आबद्ध रहेका रमाकान्त बराल हिसान गण्डकीका संस्थापक अध्यक्ष हुन् ।
