तनहुँ शुक्लागण्डकी तीन जना हत्या काण्डः राजमार्ग पुगेपछि अलमलियो कुकुर
पोखरा, २८ पुस/ तनहुँ शुक्लागण्डकी नगरपालिका–५ कसेरीघाटमा निर्माणाधिन फोहोरमैला प्रशोधन केन्द्रमा भएको हत्याका बारेमा प्रहरीले अनुसन्धान गरी रहेको छ ।
फोहोर मैला प्रशोधन केन्द्रको कम्पाउण्ड बाहिर दुई जना पुरुषको शव फेला परेको थियो भने केहीपर महिलाका शव फेलापरेको थियो । तीनै जनालाई धारिलो हतियार प्रहार गर्दा मृत्यु भएको देखिन्छ ।
घटना रहस्यपूर्ण बन्यो तत्काल प्रहरीको प्राविधिक र तालिम प्राप्त कुकुर परिचालन गरि घटनाको अनुसन्धान सुरु भयो । दुई पुरुषको शव भेटिएको स्थानबाट कुकुरले अनुसन्धान सुरु ग¥यो । पहिला फोहोर प्रशोधन केन्द्रतर्फ पुगेको तालिम प्राप्त कुकुर पछि महिलाको शव भएको स्थानतर्फ लाग्यो ।
त्यसपछि क्याम्पस बस्ती हुँदै पृथ्वीराजमार्गसम्म पुगेको कुकुर त्यही अलमलियो । राजमार्ग पुगेपछि कुकुर अलमलिएपछि प्रहरीले अपराधी गाडी चढेर गएको प्रारम्भिक अनुमान लगायो ।
दुइ दिनसम्मको अनुसन्धानमा समेत प्रहरीले घटनाबारेमा कुनै ‘क्लु’ फेला पार्न सकेको छैन । घटनाबारे बुझ्न आइतबार गण्डकी प्रदेश प्रहरी कार्यालय प्रमुख प्रहरी नायब महानिरीक्षक दिनेश कुमार आचार्य नै घटनास्थल पुगे । तीन जनाको एक रातमै विभत्स हत्याले तनहुँमा हल्ला खल्ला मच्याएको छ ।
