होमवर्क नगरेको भन्दै विद्यार्थी कुटपिट गर्न शिक्षकलाई कास्की प्रहरीले पक्राउ
पोखरा, २२ जेठ/ पोखरा महानगरपालिका वडा नम्बर ३२ स्थित युनिभर्स इंग्लिस बोर्डिङ स्कुलका शिक्षक सुदीप अधिकारी पक्राउ छन् ।
जेठ १३ गते कक्षा ५ मा अध्ययनरत ९ वर्षीय विद्यार्थीलाई होमवर्क नगरेको र अक्षर पनि नराम्रो भएको भन्दै कुटपिट गरेको आरोपमा पक्राउ परेका हुन् ।
शिक्षकको कुटाइबाट विद्यार्थी घाइते भएका थिए । उनले सञ्चार माध्यम मार्फत विद्यार्थीलाई कुटपिट गर्नु आफ्नो गल्ती भएको स्वीकार गरेका थिए ।
अधिकारीविरुद्ध बालबालिका सम्बन्धी ऐन अन्तगर्तगको कसुरमा ५ दिनको म्याद लिएर अनुसन्धान अघि बढाइएको कास्की प्रहरीका सूचना अधिकारी प्रहरी नायव उपरीक्षक वसन्तकुमार शर्माले जानकारी दिए ।
उनलाई अदालतले दोषी ठहर गरेमा एक वर्ष कैद सजाय र ५० हजार रुपैयाँ जरिवाना हुन सक्नेछ ।
