पर्यटन प्रवद्र्धनका साथ ११३ औं अन्तराष्ट्रिय महिला दिवस मनाउँदै टेवान
पोखरा, २४ फागुन/ अन्तराष्ट्रिय महिला दिवसका अवसरमा पर्यटन व्यवसायी महिला संघ नेपाल(टेवान)ले म्याग्दी तथा हिमाल पारीको जिल्ला मुस्ताङको कोरला नाकासम्म आजदेखि पर्यटन प्रवद्र्धन कार्यक्रम सुरु गरेको छ ।
नेपाल पर्यटन बोर्ड, पर्यटन मन्त्रालय गण्डकी प्रदेश र पोखरा महानगरपालिकाको सहयोगमा गर्न लागिएको प्रवद्र्धनात्मक कार्यक्रममा पर्यटनसम्बद्ध संघ संस्थाका प्रतिनिधि, सञ्चारकर्मी सहित ३२ जनाको सहभागिता रहेको टेवानका अध्यक्ष कमला गिरीले जानकारी दिनुभयो ।
कोरोना लगायतका विभिन्न कारणले सुस्ताएको पर्यटनलाई पूर्ववत् अवस्थामा फर्काउनका लागि चारदिने प्रवद्र्धन कार्यक्रम आयोजना गरिएको बताउँदै उहाँले यस क्रममा स्थानीय पर्यटन व्यवसायीका लागि क्षमता अभिबृद्धि लगायतका कार्यक्रम राखिएको जानकारी दिनुभयो ।
कार्यक्रमका क्रममा युवा तथा महिला उद्यमीलाई लक्षित गरी म्याग्दीको बेनी, मुस्ताङको जोमसोम, ठिनी, उपल्लो मुस्ताङस्थित लोमन्थाङमा क्षमता अभिबृद्धि तालिम एवम् अन्तरक्रिया गर्ने जनाइएको छ । नेपाल र चीनबीचको सीमा नाका कोरला नाकसम्मको प्रवद्र्धनात्मक भ्रमणका क्रममा धार्मिक एवम् ऐतिहासिक स्थलहरू मुक्तिनाथ, गुम्बा आदिकोे प्रवद्र्धन गरिने गिरीले जानकारी दिनुभयो ।
कार्यक्रम अन्तर्गत स्थानीय पर्यटन व्यवसायीका लागि क्षमता अभिबृद्धि, डिजिटल मार्केटिङ तालिम एवम् स्थानीय उत्पादनको ब्राण्डिङ र घरवास प्रवद्र्धन गरिने कार्यक्रम संयोजक शोभा अधिकारी पौडेलले जानकारी दिनुभयो ।
