गण्डकीका यातायात व्यवसायी आन्दोलनमा
पोखरा, १८ साउन/ सरकारले सवारी साधनको कर वृद्धि गरेको भन्दै गण्डकी प्रदेशका सार्वजनिक यातायात व्यवसायी आन्दोलित बनेका छन् ।
नेपाल यातायात व्यवसायी राष्ट्रिय महासंघ गण्डकीले २२ साउन देखि प्रदेशभरका सार्वजनिक गाडी घर ग्यारेज मै थन्काउने घोषणा गरेको हो ।
जनता मूल्यवृद्धिबाट पीडित भइरहँदा सरकारले गैरजिम्मेवार भई कर बढाएर असुल्न लागि परेकाले आन्दोलनको घोषणा गर्नुपरेको महासंघले बुधबार जारी गरेको विज्ञप्तिमा उल्लेख छ ।
गण्डकी प्रदेशमा चालु आर्थिक वर्ष २०७९/८० देखि सवारी क्षमताअनुसार कर ४ सय रुपैयाँ देखि १० हजार रुपैयाँसम्म बढेको छ ।
सवारी कर साझा विषय भएको भन्दै महासंघले निजी र पर्यटक सवारीलाई पनि आन्दोलनमा साथ दिन आह्वान गरेको छ ।
