पोखरा १७ मा गठबन्धनको घरदैलोः एमालेका जनप्रतिनीधिले गर्दा दुख पाएको मतदाताको गुनासो
पोखरा, २३ बैशाख/ पोखरा महानगरपालिका वडा नम्बर १७ मा गठबन्धनको तर्फबाट उम्मेदवारी दिएका उम्मेदवारहरुको घरदैलोमा पुगेर आफ्नो पक्षमा मत मागेका छन् । उम्मेदवारहरुले आगामी ५ बर्षमा जनअपेक्षाअनुसार काम गरेर वडालाई व्यवस्थित र नमूना बनाउने प्रतिबद्धता समेत जनाएका छन् ।
‘हामी घरदैलो गरिरहँदा जनताहरुले हामीप्रति ठुलो आशा अनि भरोषा देखाएका छन् । अघिल्लो पटक एमालेका जनप्रतिनीधिहरुले राम्रो काम गर्न नसकेको प्रति मतदाताहरुको ठुलो गुनासो छ ।’ नेपाली काँग्रेसको तर्फबाट अध्यक्षमा उम्मेदवारी दिएका देवराज आचार्यले भने–‘त्यसैले पनि नेपाली काँग्रेस र गठबन्धनको तर्फबाट घरदैलोमा जाँदा जनताले हामीप्रति सदाशयता देखाएका छन् ।’
गठबन्धनको तर्फबाट युवा जोश र जाँगरसहितका शिक्षित उम्मेदवारहरु आसन्न निर्वाचनमा उठेकाले पनि यो समूहसँग जनअपेक्षा बढेको आचार्यको बुझाई छ । आचार्यले आफूहरु निर्वाचित भएर आएको खण्डमा वडाबासीले गर्व गर्ने गरि काम गर्ने बताए ।
बुधबार गठबन्धनको तर्फबाट वडा नम्बर १७ मा राष्ट्रबैंकचोक, ड्यामसाईड, स्याउली बजार र बिरौटाको मूख्य बजार क्षेत्रमा घरदैलो सम्पन्न भयो । विकास निर्माणको काममा ढिलासुस्ती हुँदा पनि स्थानिय सरकारले काम गर्ने कुनै चासो नदेखाएको भन्दै सो क्षेत्रका बासिन्दाले उम्मेदवारहरुसँग गुनासो गरेका थिए । लामो समय यता सिद्धार्थ राजमार्गको विस्तारको नाममा सो क्षेत्रका बासिन्दाहरुले धुलोधुँवा र हिलो बाटोमा यात्रा गर्नुपरेकोले सास्ती भएको बताएका थिए ।
पोखरा १७ मा यसपटकको स्थानीय चुनावमा गठबन्धनको तर्फबाट अध्यक्षमा देवराज आचार्य र सदस्यहरुमा रञ्जिता सुबेदी, शोभा विश्वकर्मा, गोबिन्द बराल, बिक्रम भण्डारीले उम्मेदवारी दिएका छन् । यो समूहले पर्यटन, सामाजिक, साँस्कृतिक, युवा र खेलकुदको क्षेत्रमा आफूहरुले विशेष गुरुयोजना बनाएर काम गर्ने प्रतिबद्धता व्यक्त गरेको छ ।
