पर्यटन प्रर्वद्धन गर्न सातै प्रदेशमा कन्दराको लाइभ कन्सर्ट, पोखरामा शुक्रबार
पोखरा, २६ पुस/ पोखरामा शुक्रबार ‘पहिला घरदेश अनि परदेश’ भन्ने नारा सहित कन्दरा व्याण्डको लाइभ कन्सर्टको तयारी अन्तिम चरणमा पुगेको छ ।
पोखरा पर्यटन परिषद्को सहकार्यमा पोखराबाट सुरु गरि ७ प्रदेशमा पु¥याउने लक्ष्य रहेको आयोजकको भनाई छ । पुस २७ गते हुने कन्सर्टमा कम्तीमा १० हजार दर्शक पोखरा प्रर्दशनी केन्द्र नयाँबजारमा उपस्थित हुने आयोजकको अनुमान छ ।
कन्सर्टको साथमा पर्यटनको प्रर्वद्धनको लागि विभिन्न जानकारी समेत दर्शकलाई गराउने पोखरा पर्यटन परिषद्का अध्यक्ष पोमनारायण श्रेष्ठले बताए । झण्डै २० वर्ष पछि हुन लागेको कन्दरा व्याण्डको सोलो लाईभ कन्सर्टलाई भव्य बनाउन लागि परेको उनले बताए ।
कार्यक्रमले पोखरा तथा आसपासमा आन्तरिक पर्यटकको आगमन बढाउने मात्र नभइ देशका सातै प्रदेशको पर्यटनलाई चलायमान बनाउन सघाउने उनको विश्वास छ । अन्य प्रदेशको मिति भने पछि तय गर्ने उनले बताए ।
दुई घण्टाको समयको लाईभ कन्सर्टमा कन्दराका नयाँ पुराना गरेर झण्डै डेढ दर्जन गीत सुन्न कन्दरा व्याण्डका गायक विवेक श्रेष्ठले बताए ।
साँझ ५ बजे बाट शो सुरु हुनेछ । कन्सर्टमा कन्दराका पुराना चर्चित गीतहरु तिमी पारी, विदेशीएर गइन उनी, तगारोमा रुमाल राखी, चञ्चले कान्छी, लेककी हे माया, हङकङ पोखरा लगायतका गीत नयाँ प्रस्तुतीमा सुन्न पाइने उनले बताए ।
आदि गु्रपले व्यवस्थापन गरिरहेका कन्दरा व्याण्डमा मुख्य भोकलिष्ट श्रेष्ठसँगै सुनिल थापा, हरि महर्जन, देव लामा, पङ्कज झा, सुन्दर महर्जन व्याण्ड मेम्बर रहेका छन् । व्याण्डको स्थापना ३० वर्ष अगाडि पोखरामा भएको हो ।
कन्सर्ट हेर्न दर्शकले ३ सय र १ हजार रुपैयाँको टिकट काट्नुपर्नेछ । अहिलेसम्म ६ वटा एलबम दर्शक श्रोतामाझ पस्किएको कन्दराले ५० को दशकमा थुप्रै कन्सर्ट पोखरा सहित नेपालका विभिन्न ठाउँ र विदेशमा समेत गरेको थियो ।
